दुहबी । सुनसरीको दुहबी नगरपालिका–८ मा सञ्चालित अरिहन्त इन्फ्रास्ट्रक्चरबाट निस्कने धुलो, धुवाँ र फोहोर पानीको जथाभावी निस्कासनले स्थानीय बासिन्दा त्रस्त बनेका छन् ।
प्रदूषित पानी जथाभावी बिसर्जन गरेपछि पीडित बनेका स्थानीयले उचित समाधानको माग गर्दै मंगलबार दुहबी नगरपालिकामा निवेदन दर्ता गरेका छन् ।
पीडित स्थानीयहरूले नगरपालिकाका उपप्रमुख मेनुका पोखरेल खतिवडा तथा वातारवरण शाखा विमल नारायण चौधरीसँग भेटघाट गरी समस्याको गम्भीरताबारे जानकारी गराएका छन् ।
छलफलमा उद्योगबाट निस्कने फोहोर पानीले गाउँबस्ती डुबाउन थालेको, धुलो र धुवाँले दैनिक जनजीवन कठिन बनाएको लगायतका गुनासाहरू राखिएको बताइएको छ ।
स्थानीयवासीले स्पष्ट र ठोस समाधान नआएसम्म आफ्नो अडान नछोड्ने चेतावनी दिएका छन् । “फोहोर व्यवस्थापन हुनैपर्छ, गाउँबस्ती डुबाउन पाइँदैन, निमुखालाई रुवाउन पाइँदैन,” स्थानीयवासीले भने ।
उद्योगबाट हुने वातावरणीय प्रदूषणविरुद्ध सम्बन्धित निकायले प्रभावकारी कदम चाल्नुपर्ने र उद्योग सञ्चालकलाई जिम्मेवार बनाउनुपर्ने माग स्थानीयहरूको छ ।
यता, नगरपालिकाले भने यसै विषयलाई लिएर सम्बन्धित उद्योगलाई पत्र काटिसकेको छ । स्थानीयबाट गुनासो आएको भन्दै पत्र काटिएको र वातारवरण शाखा विमल नारायण चौधरीले जानकारी दिए ।
