काठमाडौं । नेपाल कम्युनिष्ट पार्टी (एमाले)ले पार्टी सदस्यता व्यवस्थापनलाई पूर्ण रूपमा डिजिटल प्रणालीमा रूपान्तरण गर्ने निर्णय गरेको छ।
पार्टी केन्द्रीय कार्यालयमा आयोजित सदस्यतासम्बन्धी बैठकमा यसबारे विस्तृत छलफल भएको जानकारी सङ्गठन विभाग संयोजक तथा केन्द्रीय सचिव भानुभक्त ढकालले दिएका छन्।
बैठकमा पार्टी उपाध्यक्ष, महासचिव, प्रदेशस्तरीय नेताहरू तथा विभिन्न जनसङ्गठनका प्रतिनिधिहरूको सहभागितामा सदस्यता व्यवस्थापनसम्बन्धी डेमो (प्रदर्शनात्मक) प्रस्तुति गरिएको थियो। सो क्रममा प्रस्तावित डिजिटल प्रणाली र यसको कार्यान्वयन प्रक्रियाबारे छलफल गरिएको बताइएको छ।
यस अवसरमा पार्टी उपाध्यक्ष विष्णुप्रसाद पौडेलले अनलाइन सदस्यता नवीकरण अभियानले पार्टीलाई थप व्यवस्थित, पारदर्शी र प्रभावकारी बनाउने विश्वास व्यक्त गरे।
