काठमाडौं । सशस्त्र प्रहरी बल नेपालका नवनियुक्त महानिरीक्षक (आईजीपी) नारायणदत्त पौडेलले सोमबार दर्ज्यानी चिन्ह (फुली) लगाउने भएका छन्।
४ वर्षे पदावधि पूरा भएपछि पूर्व आईजीपी राजु अर्याल १८ वैशाखमा अनिवार्य अवकाशमा गएका थिए। सोही रिक्त पदमा सरकारले पौडेललाई नियुक्त गर्ने निर्णय गरिसकेको छ। यद्यपि शनिबारदेखि पद रिक्त भए पनि बीचमा सार्वजनिक बिदा परेकाले सोमबार मात्रै औपचारिक रूपमा फुली लगाउने कार्यक्रम तय गरिएको हो।
गृह मन्त्रालय स्रोतका अनुसार राजकुमार श्रेष्ठको हातबाट पौडेलले दर्ज्यानी चिन्ह प्राप्त गर्नेछन्। यसअघि निवर्तमान गृहमन्त्री सुधन गुरुङले आईजीपीलाई प्रधानमन्त्रीबाट फुली लगाउने व्यवस्था गरिने बताएका थिए। तर, गुरुङ पदमुक्त भएपछि उक्त प्रस्ताव कार्यान्वयनमा नआएको जनाइएको छ।
गृह मन्त्रालयले सोमबार बिहान करिब पौने ९ बजे फुली लगाउने कार्यक्रमको तयारी गरिसकेको जनाएको छ।
