काठमाडौं । काठमाडौंको नयाँ बसपार्क नजिक विष्णुमती नदी किनारमा अनधिकृत संरचना हटाउने क्रममा रोकिएको डोजर पुनः सञ्चालनमा आएको छ। स्थानीयले लालपुर्जा रहेको दाबी गर्दै अवरोध गरेपछि केही समयका लागि रोकिएको अभियान छानबिनपछि पुनः सुरु गरिएको हो।
ईश्वरराज पौडेलका अनुसार -सरकारी टोलीले उक्त क्षेत्रमा बनेका घरहरू नदी किनारमै मापदण्डविपरीत निर्माण गरिएको निष्कर्ष निकालेको छ। “नदी किनारबाटै जग उचालेर घर बनाइएको देखियो,” उनले भने, “त्यसैले अहिले ती घरहरूमा डोजर चलाउने काम पुनः सुरु भएको छ।”
स्थानीय बासिन्दाले आफूहरूसँग वैधानिक लालपुर्जा रहेको दाबी गर्दै घर भत्काउन नदिने अडान लिएपछि प्रशासनले ८ सदस्यीय छानबिन टोली खटाएको थियो। सो टोलीले जग्गाको वास्तविक अवस्थाबारे अध्ययन गरेपछि संरचना हटाउने निर्णय कायम राखिएको हो।
प्रशासनका अनुसार यदि छानबिन क्रममा नदी किनारबाहेकको निजी जग्गा प्रमाणित भएमा त्यस्तो जग्गा सम्बन्धित धनीलाई फिर्ता गरिनेछ। तर नदी किनार अतिक्रमण गरी निर्माण गरिएका संरचना भने हटाइने स्पष्ट पारिएको छ।
अभियान अन्तर्गत जिल्ला प्रशासन कार्यालय काठमाडौं र काठमाडौं महानगरपालिकाको समन्वयमा नदीकिनारका अतिक्रमण हटाउने कार्य तीव्र रूपमा अघि बढाइएको छ।
