काठमाडौं । जेनजी अभियन्ता रक्षा बमले प्रधानमन्त्री बालेन्द्र शाह (बालेन) लाई ‘ज्ञानको अहंकार’ नदेखाउन सुझाव दिएकी छन्।
सामाजिक सञ्जाल फेसबुकमा शनिबार स्टाटस लेख्दै उनले जनता स्वयं सबैभन्दा ज्ञानी हुने भन्दै उनीहरूको भावनालाई सम्मान गर्न आग्रह गरेकी हुन्।
“जनता जति ज्ञानी कोही हुन सक्दैनन्। ज्ञानी जनताको अगाडि ज्ञानको अहंकार नदेखाऊ,” उनले लेखेकी छन्। साथै, विश्व शान्तिको केन्द्र बन्न सक्ने मुलुकमा शासनको शैली निर्देशन र बन्दुकमा आधारित हुन नसक्ने उनको भनाइ छ।
बमले प्रधानमन्त्रीलाई ‘काँध थाप्ने’ र ‘छाती थाप्ने’ शैलीबाट बाहिर निस्केर करुणा र समानुभूतिमा आधारित नेतृत्व प्रदर्शन गर्न आग्रह गरेकी छन्। उनले बुद्ध जन्मेको देशमा शासन सञ्चालन गर्दा संवेदनशीलता र मानवीय दृष्टिकोण आवश्यक हुने उल्लेख गरेकी छन्।
“तिम्रा हरेक निर्देशनहरूले जनतामा असर पारिरहेका छन्,” उनले लेखेकी छन्, “ज्ञानको अहंकारबाट बाहिर निस्केर करुणा र जिम्मेवारीका साथ काम गर।”
