काठमाडौं । काठमाडौं उपत्यकाका बागमती तथा सहायक नदी किनारामा रहेका अतिक्रमित बस्ती हटाउने अभियान शनिबार पनि जारी रहेको छ। सङ्घीय सरकार र काठमाडौं महानगरपालिकाको संयोजनमा कामपा–१६ बालाजुस्थित विष्णुमणि नदी र धोबीखोला किनारमा रहेका घरटहरा हटाउने कार्य भइरहेको हो।
मुक्तिराम रिजालका अनुसार कामपा–१५ स्वयम्भू क्षेत्रका अतिक्रमित संरचना हटाउने काम पनि निरन्तर जारी छ। “स्वयम्भू, बालाजु–गोङ्गबु बसपार्क, देवीनगरलगायत क्षेत्रमा अवैध संरचना हटाउने कार्य भइरहेको छ,” उनले जानकारी दिए।
यसअघि शुक्रबार सरकारले बल्खु र कालिमाटी क्षेत्रमा नदीकिनारका जोखिमयुक्त बस्ती हटाएको थियो। प्रशासनका अनुसार हालसम्म काठमाडौं उपत्यकाभित्र सरकारी, सार्वजनिक तथा निजी जग्गा अतिक्रमण गरी निर्माण गरिएका करिब दुई हजार घरटहरा हटाइसकिएको छ।
वस्ती हटाउने क्रममा प्रभावित परिवारहरूलाई अस्थायी रूपमा ‘होल्डिङ सेन्टर’मा राखिएको प्रशासनले जनाएको छ।
सरकारले नदीकिनारका अतिक्रमण हटाएर सम्भावित बाढी तथा विपद् जोखिम न्यूनीकरण गर्ने उद्देश्यसहित अभियान सञ्चालन गरेको बताइएको छ।
