काठमाडौं । प्रा.डा. धनेश्वर नेपालले संस्कृत विश्वविद्यालयको उपकुलपति पदबाट राजीनामा दिएका छन्। सरकारले विश्वविद्यालयका पदाधिकारी हटाउनेगरी अध्यादेश सिफारिस गरेपछि उपकुलपतिहरूको राजीनामा क्रम जारी रहेको छ।
नेपालले शुक्रबार राजीनामा दिएको पुष्टि गर्दै भने, “हिजो राजीनामा दिएको छु, २२ गतेबाट लागू हुनेगरी दिएको हो। बीचमा २ दिन बिदा परेको छ, २१ गते विश्वविद्यालयमा बिदाइ कार्यक्रम हुन्छ।”
उनी २०८१ पुस ७ गते तत्कालीन प्रधानमन्त्री केपी शर्मा ओलीद्वारा उपकुलपतिमा नियुक्त भएका थिए।
यसअघि त्रिभुवन विश्वविद्यालयका पदाधिकारीहरूले पनि सामूहिक रूपमा राजीनामा दिएका थिए। वैशाख १७ गते उपकुलपति प्रा.डा. दिपक अर्याल, शिक्षाध्यक्ष प्रा.डा. खड्ग केसी र रजिस्ट्रार प्रा.डा. केदारप्रसाद रिजालले पद त्याग गरेका हुन्।
राजनीतिक नियुक्ति लिएका पदाधिकारीहरूलाई मार्गप्रशस्त गर्नुपर्ने माग उठिरहेकै बेला सरकारले अध्यादेशमार्फत हटाउने तयारी गरेपछि राजीनामा दिने क्रम बढेको हो। राष्ट्रिय स्वतन्त्र पार्टीले पनि यसअघि राजनीतिक नियुक्तिहरू हटाउनुपर्ने धारणा सार्वजनिक गरेको थियो।
सरकारले सिफारिस गरेको अध्यादेशबारे रामचन्द्र पौडेलले अध्ययन गरिरहेको बताइएको छ।
