काठमाडौं । काठमाडौं महानगरपालिकाले बल्खु क्षेत्रमा अनाधिकृत रूपमा निर्माण गरिएका घर टहराहरू हटाउन डोजर चलाएको छ। वडा नम्बर १४ मा आज बिहानदेखि सुरु गरिएको उक्त अभियानमा सुरक्षाकर्मी र नगरप्रहरी परिचालन गरिएको छ।
डोजर चलिरहँदा केही बासिन्दाहरू आफ्ना सामान ओसारिरहेका देखिएका छन् भने कतिपयले आफ्नै घर भत्किँदै गरेको दृश्य विवश भएर हेर्नु परेको छ।
बल्खुसँगै वडा नम्बर ११ अन्तर्गत पर्ने वंशीघाट क्षेत्रमा पनि आजै डोजर चलाइएको छ। यसैगरी वडा नम्बर १५ को स्वयम्भु, वडा नम्बर १६ को बालाजु तथा वडा नम्बर ३ र २६ का सामाखुशी, खाडिपाखा र रानीबारी लगायतका अतिक्रमित क्षेत्रमा समेत अभियान सञ्चालन गरिने जनाएको छ।
जिल्ला प्रशासन कार्यालय काठमाडौंले बुधबार जारी गरेको सूचनाअनुसार वैशाख १८ बिहान ७ बजेदेखि एकैपटक बस्ती खाली गराउने अभियान सुरु गरिएको हो। नदी किनार तथा सार्वजनिक, सरकारी र निजी जग्गा अतिक्रमण गरी वर्षौँदेखि बसोबास गर्दै आएका बस्तीहरूलाई हटाउने निर्णय गरिएको प्रशासनले जनाएको छ।
प्रशासनका अनुसार, बस्ती हटाउने कार्य मानवीय उद्धार र सम्भावित विपद् जोखिम न्यूनीकरणलाई ध्यानमा राखेर गरिएको हो।
यसअघि सरकारले वैशाख १२ गतेदेखि थापाथली, गैरीगाउँ, सिनामंगल र मनोहरा क्षेत्रका सुकुमवासी बस्तीमा पनि डोजर चलाइसकेको छ। पछिल्ला दिनहरूमा माइकिङ सुरु भएपछि केही बासिन्दा भने अभियानअघि नै बस्ती छाडेर हिँड्न थालेका थिए।
