काठमाडौं। नेपाल पत्रकार महासंघ (एफएनजे) ले पत्रकारहरूमाथि भएको धम्की र आक्रमणप्रति गम्भीर ध्यानाकर्षण भएको जनाएको छ। महासंघले प्रेस विज्ञप्ति जारी गर्दै मोरङको ग्रामथान गाउँपालिका–४ स्थित लोहन्द्रा खोलामा भइरहेको उत्खननसम्बन्धी समाचार संकलनका क्रममा पत्रकारहरूलाई ज्यान मार्ने धम्की दिइएको घटनाको निन्दा गरेको हो।
विज्ञप्तिअनुसार उक्त घटनामा पत्रकारहरू डुमरलाल मेहता, मोहन ढकाल, सन्तोष मेहता, नगेद्र खड्का, प्रवेश तिम्सिना, ब्रह्मदेव महतो र दीपेन्द्रकुमार साहमाथि धम्की दिइएको उल्लेख छ। साथै, ग्रामथान गाउँपालिकाका अध्यक्ष नमोनारायण माझीको संलग्नतामा पत्रकारलाई धम्क्याइएको भन्दै महासंघ मोरङ शाखाले जानकारी गराएको पनि विज्ञप्तिमा जनाइएको छ।
महासंघले सार्वजनिक सरोकारका विषयमा नागरिकलाई सूचित गर्ने आफ्नो कर्तव्य निर्वाह गरिरहेका पत्रकारमाथि यस्तो व्यवहार हुनु अत्यन्त निन्दनीय भएको बताएको छ। यस्तो कार्य प्रेस स्वतन्त्रतामाथिको हस्तक्षेप भएको ठहर गर्दै दोषीलाई कानुनी दायरामा ल्याउन माग गरिएको छ।
साथै, आगामी दिनमा यस्ता घटना दोहोरिन नदिन सम्बन्धित निकायसँग पहल गर्न र पत्रकारलाई सुरक्षित तथा निर्वाध रूपमा काम गर्ने वातावरण सुनिश्चित गर्न महासंघले आग्रह गरेको छ।
