काठमाडौं। रामचन्द्र पौडेलले सरकारले संसद् स्थगित गरेर सिफारिस गरेका अध्यादेशबारे आज संविधानविदहरूसँग परामर्श गर्ने भएका छन्। राष्ट्रपतिको सचिवालयका अनुसार आज अपराह्न ४ बजे शीतल निवासमा संविधानविद्हरूलाई बोलाएर यस विषयमा छलफल गरिनेछ।
सरकारले यही वैशाख १४ र १५ गते गरी ६ वटा अध्यादेश स्वीकृतिका लागि राष्ट्रपतिसमक्ष सिफारिस गरेको छ। ती अध्यादेशहरूमा संवैधानिक परिषद्को काम, कर्तव्य र अधिकार सम्बन्धी ऐन–२०६६ संशोधन, सहकारी ऐन–२०७४ संशोधन, स्वास्थ्य विज्ञान प्रतिष्ठान सम्बन्धी, केही नेपाल कानुन संशोधन गर्ने, सार्वजनिक पदाधिकारी पदमुक्ति तथा विश्वविद्यालयसम्बन्धी अध्यादेश समावेश छन्।
संघीय संसद् बैठक आह्वान गरिएको भोलिपल्टै स्थगित गरेर अध्यादेश सिफारिस गरिएको विषयलाई लिएर राजनीतिक वृत्तमा आलोचना बढेको छ। विपक्षी दलहरूले समेत यस कदमको विरोध जनाउँदै आएका छन्। यस्तो अवस्थामा राष्ट्रपतिले संविधानविदहरूसँग परामर्श गर्न लाग्नुलाई महत्त्वपूर्ण कदमका रूपमा हेरिएको छ।
