काठमाडौं। प्रतिभा रावल, भूमि व्यवस्था, सहकारी तथा गरिबी निवारणमन्त्रीले देशभरका मालपोत कार्यालयहरूबाट भइरहेको सेवा प्रवाहको अवस्थाबारे आफ्नै कार्यकक्षबाट नियमित रूपमा डिजिटल माध्यममार्फत अनुगमन तथा निरीक्षण गर्ने व्यवस्था लागू गरेकी छन्।
मालपोत कार्यालयहरूमा सर्भर डाउन हुने लगायतका गुनासाहरू बढ्दै गएपछि सेवा प्रवाहको वास्तविक अवस्था तत्काल बुझ्न र समस्याहरूको छिटो समाधान सुनिश्चित गर्न यस्तो प्रणाली कार्यान्वयनमा ल्याइएको हो। अब मन्त्री रावलले आफ्नै कार्यकक्षबाट प्रत्यक्ष रूपमा सेवा प्रवाहको निगरानी गर्न सक्नेछिन्।
यस पहलबाट मालपोत सेवा थप प्रभावकारी, पारदर्शी र सेवाग्राहीमैत्री बन्ने अपेक्षा गरिएको छ। साथै, सेवामा देखिने ढिलासुस्ती तथा प्राविधिक समस्याहरूलाई समयमै पहिचान गरी समाधान गर्न सहज हुने विश्वास मन्त्रालयले व्यक्त गरेको छ।
