काठमाडौं। काठमाडौँ उपत्यकामा ट्राफिक नियम उल्लङ्घन गर्ने चालकहरूमाथि कडाइ गर्दै ट्राफिक प्रहरीले पछिल्लो २४ घण्टामा २ हजार ७२२ जना चालकलाई कारबाही गरेको जनाएको छ।
ट्राफिक प्रहरी प्रवक्ता एवं प्रहरी उपरीक्षक नरेशराज सुवेदी का अनुसार उपत्यकाका विभिन्न स्थानमा गरिएको चेकिङका क्रममा मादक पदार्थ (मापसे) सेवन गरी सवारी चलाउने ४६, राइड सेयरिङ नियम उल्लङ्घन गर्ने २३६, रातोबत्ती उल्लङ्घन गर्ने १८१, तीव्र गतिमा सवारी चलाउने १५४, लेन क्रस गर्ने ३४२, फुटपाथ प्रयोग गर्ने १३७, हर्न निषेध उल्लङ्घन गर्ने ५५, ओराल्ने तथा चढाउने नियम उल्लङ्घन गर्ने ५६ र अन्य विभिन्न कसुरमा १ हजार ५१५ जना चालकलाई कारबाही गरिएको हो।
उक्त कारबाहीबाट कुल २ हजार ७२२ सवारीसाधनका चालकलाई नियन्त्रणमा लिई कारबाही गर्दा रु २७ लाख २७ हजार ६ रुपैयाँ राजस्व सङ्कलन भएको उनले जानकारी दिए। साथै, मादक पदार्थ सेवन गरी सवारी चलाउनु गम्भीर र दण्डनीय अपराध भएकाले यस्तो अवस्थामा चालक देखिएमा नजिकको प्रहरी कार्यालय, ट्राफिक कन्ट्रोल रूमको हटलाइन नम्बर १०३ वा प्रहरी हटलाइन १०० मा तुरुन्त जानकारी गराउन ट्राफिक प्रहरीले सर्वसाधारणलाई आग्रह गरेको छ।
