पूर्वमन्त्री तथा प्रतिनिधि सभा सदस्य महावीर पुनले आफ्नो सम्पत्ति विवरण सार्वजनिक गरेका छन्। उनले आफूसँग करिब तीन तोला सुन, कास्कीको पोखरा महानगरपालिका–७ माझठानामा चार ठाउँमा फैलिएको करिब २८ रोपनी जग्गा तथा केही नगद मौज्दात रहेको जानकारी दिएका छन्।
पुनका अनुसार उक्त जग्गा २०५२ सालमा पदम पुनसँग मिलेर करिब ४ लाख रुपैयाँमा खरिद गरिएको हो। जग्गा खरिदको स्रोत अमेरिकाबाट फर्किँदा बचेको स्वआर्जन रहेको उनले उल्लेख गरेका छन्। हाल सो जग्गा राष्ट्रिय आविष्कार केन्द्र सञ्चालनका लागि बिक्रीमा राखिएको भए पनि अझै बिक्री हुन सकेको छैन।
उनले करिब तीन तोला सुन २०६० सालतिर किनेको जनाएका छन्। तर त्यसको स्रोत श्रीमतीलाई इष्टमित्रबाट प्राप्त उपहार भएको विवरणमा उल्लेख गरिएको छ।
नगद मौज्दाततर्फ, नेपाल बैंक लिमिटेड मा करिब ४ लाख रुपैयाँ र राष्ट्रिय वाणिज्य बैंक मा करिब २५ लाख रुपैयाँ रहेको उनले बताएका छन्। नेपाल बैंकमा रहेको रकम साथीहरूबाट व्यक्तिगत खर्चका लागि प्राप्त भएको र राष्ट्रिय वाणिज्य बैंकमा रहेको रकम प्रतिनिधि सभा निर्वाचनका क्रममा सहयोगीहरूले दिएको चन्दाबाट बचेको उनले स्पष्ट पारेका छन्। उक्त रकम बेनीस्थित सम्पर्क कार्यालय सञ्चालनमा खर्च गरिने योजना रहेको छ।
यसैबीच, आफ्नो आत्मकथा पुस्तकबाट करिब २ लाख ५० हजार रुपैयाँ आम्दानी भएको र सो सम्पूर्ण रकम राष्ट्रिय आविष्कार केन्द्र तथा वीरगञ्ज कृषि औजार कारखाना सञ्चालनका लागि जम्मा गरिएको पुनले जानकारी दिएका छन्।
उनका अनुसार यी बाहेक आफूसँग कुनै ऋण, सवारी साधन, कृषि वा पशुधन तथा अन्य सम्पत्ति नरहेको उल्लेख गरेका छन्।
