विराटनगर । नेपाली सेनाले मोरङ जिल्लाका विभिन्न स्थानीय तहसँग सुकुम्बासी बस्तीको विस्तृत विवरण मागेको छ । सेनाको शिवदल गण, थलाहा ब्यारेकबाट पत्राचार गर्दै जिल्लाका नगरपालिका तथा गाउँपालिकालाई आफ्नो क्षेत्रभित्र रहेका अव्यवस्थित तथा सुकुम्बासी बस्तीको तथ्यांक उपलब्ध गराउन अनुरोध गरिएको हो ।
पत्रमा स्थानीय तहहरूलाई बस्ती रहेको स्थान, बसोबास सुरु भएको मिति, घरधुरी संख्या, बसोबासीको नागरिकताको अवस्था तथा अन्य आवश्यक विवरण संकलन गरी तोकिएको समयसीमाभित्र पठाउन भनिएको छ । साथै आवश्यक समन्वयका लागि जिम्मेवार सम्पर्क व्यक्तिसमेत तोकिएको उल्लेख छ ।
नेपाली सेनाको यस पहललाई व्यवस्थापन तथा आगामी योजना निर्माणसँग जोडेर हेरिएको छ । जिल्लामा पछिल्लो समय सार्वजनिक तथा खाली जमिनमा अनधिकृत बसोबास बढ्दै गएको सन्दर्भमा तथ्यांक संकलनलाई महत्त्वपूर्ण कदमका रूपमा लिइएको छ ।
