सङ्खुवासभा– मादी नगरपालिका–५ स्थित नेपाल राष्ट्रिय आधारभूत विद्यालय च्याङरीङमा प्रधानाध्यापक डम्मरुप्रसाद दाहालमाथि कार्यकक्षमै हातपात भएको छ।घटनामा संलग्न भएको आरोपमा सोही विद्यालयका शिक्षक सोमनाथ दाहाल र शिक्षिका लेखकुमारी भट्टराईलाई प्रहरीले पक्राउ गरेको जिल्ला प्रहरी कार्यालयले जनाएको छ।
वैशाख ९ गते विद्यालय व्यवस्थापन समिति गठनका क्रममा शिक्षक प्रतिनिधि छनोटलाई लिएर प्रधानाध्यापक र शिक्षकबीच विवाद उत्पन्न भएको थियो। सोही विवाद उग्र बन्दै जाँदा कार्यकक्षमै हातपात भएको र कागजातसमेत च्यातिएको प्रहरीले जनाएको छ।
घटनापछि शिक्षक संगठनहरूले कडा आपत्ति जनाउँदै दोषीमाथि कारबाहीको माग गरेका छन्। उनीहरूले विद्यालयभित्र भएको यस्तो अमर्यादित घटनालाई निन्दनीय भन्दै वार्ता र सहमतिमार्फत समाधान गर्न आग्रह गरेका छन्।
पक्राउ परेका दुवैलाई इलाका प्रहरी कार्यालय चैनपुरमा राखी थप अनुसन्धानका लागि ७ दिनको म्याद थप गरिएको प्रहरीले जनाएको छ।
