म्याग्दी– धवलागिरि गाउँपालिका–४ बगर क्षेत्रमा ६५ मेगावाट क्षमताको म्याग्दीखोला जलविद्युत् आयोजना निर्माण सुरु भएको छ।
हाइड्रो भिलेज प्रालिको प्रवर्द्धनमा निर्माण भइरहेको यस आयोजनाले पहुँचमार्ग, सुरुङ, विद्युत्गृह र प्रसारण लाइन निर्माणका काम एकसाथ अघि बढाएको छ। आयोजनाले बगरदेखि बाँधस्थल दोभानसम्म करिब १० किलोमिटर पहुँचमार्ग तयार गरिसकेको जनाएको छ।
आयोजना प्रमुख उत्तम पौडेलका अनुसार हाल ‘टेलरेस’ सुरुङ निर्माण सुरु भइसकेको छ भने विद्युत्गृह, बाँध र मुख्य सुरुङ खन्ने तयारी भइरहेको छ। यस आयोजनामा नदीबाट ल्याइएको पानी सुरुङ र पाइपमार्फत भूमिगत विद्युत्गृहमा खसालेर विद्युत उत्पादन गरिनेछ।
‘रन अफ रिभर’ प्रकृतिको यस आयोजनामा विभिन्न लम्बाइका सुरुङ, पाइपलाइन र तीन युनिटका टर्वाइन रहनेछन्। सुक्खायाम र बर्खायाममा फरक–फरक क्षमतामा विद्युत उत्पादन हुने जनाइएको छ।
उत्पादित विद्युत डाँडाखेत सबस्टेसन मार्फत राष्ट्रिय प्रसारण प्रणालीमा जोडिनेछ। यसका लागि १३२ केभी क्षमताको प्रसारण लाइन निर्माण प्रक्रिया पनि अघि बढाइएको छ।
करिब १३ अर्ब रुपैयाँ लागत अनुमान गरिएको यस आयोजना २०८४ साल चैतभित्र सम्पन्न गरी विद्युत उत्पादन सुरु गर्ने लक्ष्य राखिएको छ। साथै, मुख्य सुरुङ निर्माणका लागि आवश्यक सुरक्षा व्यवस्थापन गर्न नेपाली सेनाको क्याम्प राख्ने तयारीसमेत गरिएको छ।
