काठमाडौं– काठमाडौं उपत्यकामा सुकुम्बासी बस्ती खाली गराउने क्रममा वास्तविक सुकुम्बासीको संख्या अपेक्षाभन्दा निकै कम देखिएको सरकारी अधिकारीहरूले बताएका छन्।काठमाडौं उपत्यका विकास प्राधिकरणका अनुसार आइतबार साँझसम्म जम्मा ५४७ सुकुम्बासी परिवार मात्र सरकारको सम्पर्कमा आएका छन्। यसअघि गरिएको अनुमानभन्दा यो संख्या उल्लेखनीय रूपमा कम हो।
प्राधिकरणकी विकास आयुक्त जानुका ढकालले बस्ती खाली गर्नुअघि गरिएको अनुमान र वास्तविक तथ्यांकबीच ठूलो अन्तर देखिएको बताइन्। उनका अनुसार थापाथली, गैरीगाउँ, शान्तिनगर र मनोहरा क्षेत्रका बस्ती हटाउने क्रममा वास्तविक सुकुम्बासी अपेक्षाभन्दा निकै कम भेटिएका हुन्।
यसअघि २०६८ सालमा गरिएको अध्ययनले उपत्यकामा ३ हजार ४९६ सुकुम्बासी परिवार रहेको देखाएको थियो भने पछिल्लो अनुमानले यो संख्या करिब ६ हजार पुग्ने आँकलन गरिएको थियो। तर हालको तथ्यांकले त्यो अनुमानलाई चुनौती दिएको छ।
सरकारले बस्ती खाली गराएपछि सम्पर्कमा आएका सुकुम्बासीहरूलाई अस्थायी रूपमा कीर्तिपुरस्थित सत्सङ भवन र बालाजुका विभिन्न स्थानमा राखिएको छ। उनीहरूका लागि निःशुल्क भोजन तथा आवश्यक स्वास्थ्य सेवा उपलब्ध गराउने व्यवस्था गरिएको छ।
अब सरकारले १५ दिनभित्र ती परिवारको वास्तविकता पहिचान गर्ने योजना बनाएको छ। वास्तविक सुकुम्बासी ठहरिएका परिवारलाई इचंगुनारायणक्षेत्रमा निर्माण गरिएका अपार्टमेन्टमा राख्ने तयारी गरिएको छ। त्यहाँ तीन कोठा, शौचालय र अन्य आधारभूत सुविधा सहितका भवन तयार अवस्थामा रहेका छन्।
सरकारले दीर्घकालीन रूपमा वास्तविक सुकुम्बासीको व्यवस्थापन गर्ने र अव्यवस्थित बसोबासको समस्या समाधान गर्ने लक्ष्य राखेको जनाएको छ।
