विराटनगर -कोशी प्रदेशको राजधानी विराटनगरमा सञ्चालनमा रहेका स्पा तथा मसाज सेन्टरहरूमा प्रहरीले शनिबार साँझ एकैपटक व्यापक ‘स्विप अपरेसन’ सञ्चालन गर्दै ३६ जनालाई नियन्त्रणमा लिएको छ।
विराटनगर महानगरपालिका–१३, १४ र १५ का विभिन्न स्थानमा सञ्चालित स्पा केन्द्रहरूलाई लक्षित गर्दै इलाका प्रहरी कार्यालय रानी बाट खटिएको विशेष टोलीले आकस्मिक छापा मारेको हो।
प्रहरीका अनुसार लामो समयदेखि निगरानीमा रहेका ती स्पा केन्द्रहरूमा अवैध तथा अनैतिक गतिविधि भइरहेको सूचनाका आधारमा कारबाही अघि बढाइएको हो। प्रारम्भिक अनुसन्धानले केही स्पाहरू यौनजन्य गतिविधिको आवरणमा सञ्चालन भइरहेको आशंकालाई थप बल दिएको छ।
भारतसँगको खुला सीमाको प्रभाव देखिएको भन्दै नियन्त्रणमा परेकामध्ये केही भारतीय नागरिकसमेत रहेको जनाइएको छ। जोगबनी नाका नजिकको सहज आवतजावतका कारण यस्ता गतिविधि बढेको अनुमान गरिएको छ।
कारबाहीका क्रममा विराटनगर–१४ मा सञ्चालित ‘किपु स्पा’मा कानुनी मापदण्ड उल्लंघन भएको पाइएपछि सञ्चालकसहित कर्मचारीहरूलाई पक्राउ गरिएको प्रहरीले जनाएको छ। बिना आवश्यक अनुमति र कर्मचारीको परिचयपत्रसमेत नबनाई सञ्चालन गरिएको भेटिएको बताइएको छ।
यस प्रकरणमा सञ्चालक सुनसरी बर्जु–१ की निलमदेवी शर्मा र भारत, बिहारका राजकुमार चन्द्रवंशीसहित केही कर्मचारीहरूलाई नियन्त्रणमा लिइएको छ भने अन्य स्पाबाट पक्राउ परेकामाथि सोधपुछ जारी छ।
कवित कटवाल का अनुसार स्पा तथा मसाज सेन्टरमा यौनजन्य गतिविधि भइरहेको आशंकामा आकस्मिक छापा मारिएको हो र घटनाबारे थप अनुसन्धान भइरहेको छ।
प्रहरीले मापदण्डविपरीत सञ्चालन हुने यस्ता संस्थामाथि कडाइ निरन्तर रहने जनाएको छ। साथै लागूऔषध नियन्त्रण, सवारी दुर्घटना न्यूनीकरण र जुवातासविरुद्धको अभियानलाई पनि समानान्तर रूपमा तीव्र बनाइएको जानकारी दिइएको छ।
