धनकुटा। जिल्ला प्रशासन कार्यालय धनकुटाले सेवाग्राहीको राहदानी घरघरमै पुर्याउने व्यवस्था सुरु गरेको छ। जिल्ला प्रशासनले जिल्ला हुलाक कार्यालयसँग सम्झौता गरी तोकिएको शुल्क लिएर सेवाग्राहीको घरमै राहदानी पुर्याउने व्यवस्था गरेको हो।सरकारको शासकीय सुधार कार्यक्रमअन्तर्गत सेवा प्रवाहलाई सहज र प्रभावकारी बनाउने उद्देश्यले यो कार्यक्रम सुरु गरिएको प्रमुख जिल्ला अधिकारी बिनाेद कुमार खड्काले बताए।
मन्त्रिपरिषद्को गत चैत १३ गतेको बैठकले एक सय बुँदे शासकीय सुधार कार्यसूचीको बुँदा नम्बर २७ मा सरकारी सेवा घरमै उपलब्ध गराउने व्यवस्था उल्लेख गरिएको छ।
प्रशासन र हुलाक कार्यालयबीच सम्झौता गरी राहदानी भर्न आउने सेवाग्राहीलाई कार्यालयमै लिन आउने कि घरमै ल्याइदिनु भनेर सोधिने र घरमै ल्याइदिन चाहनेलाई छुट्टै फारम भराइ सोही ठेगानामा राहदानी पुर्याइने प्रमुख जिल्ला अधिकारी खड्काले जानकारी दिए।
घरमै राहदानी लिन चाहने सेवाग्राहीलाई हुलाक महसुल शुल्क भने लाग्नेछ। सेवाग्राहीले अतिरिक्त फारममा विस्तृत ठेगाना भरेपछि हुलाकको रजिस्टर नम्बर भएको रसिद उपलब्ध गराइने जिल्ला हुलाक कार्यालयका सूचना अधिकारी ईश्वर श्रेष्ठले बताए।
उनका अनुसार राहदानीको तौलअनुसार ५५ रुपैयाँ शुल्क लाग्नेछ। त्यसपछि खाममा नाम–ठेगाना लेखी ५५ रुपैयाँ बराबरको टिकट टाँसेर काठमाडौंबाट राहदानी बनेर आएपछि घरमै पुर्याइनेछ।
यस सेवाका लागि हुलाक कार्यालयले एक जना कर्मचारी जिल्ला प्रशासनमै खटाउने तयारी गरेको छ। यो सेवा वैशाख १४ गते सोमबारदेखि राहदानी फारम भर्ने सेवाग्राहीका लागि लागू हुने भएको छ।
सोमबारभन्दा अघि फारम भरिसकेका सेवाग्राहीको हकमा भने हुलाक दस्तुर असुल्न समस्या हुने भएकाले यो सेवा लागू नहुने जनाइएको छ।तीन नगरपालिका र चार गाउँपालिका रहेको धनकुटाका ६० वटा वडामा सर्वसाधारणले सोमबारदेखि हुलाक सेवामार्फत राहदानी पाउने व्यवस्था प्रभावकारी हुने अपेक्षा गरिएको छ।
घरमै सेवा उपलब्ध हुँदा सेवाग्राहीलाई कार्यालय धाउनुपर्ने झन्झट घट्ने, लाइन बस्नुपर्ने समस्या कम हुने तथा समय र खर्च दुवै बचत हुने विश्वास गरिएको छ। विशेषगरी ग्रामीण क्षेत्रका नागरिकका लागि यो सेवा उपयोगी हुने देखिएको छ।
घरघरमै राहदानी वितरणसँगै हुलाक सेवा सरकारी कुरियर सेवाका रूपमा विकास हुने जिल्ला हुलाक कार्यालय धनकुटाका प्रमुख रामकुमार श्रेष्ठले बताए। उनले सरकारले घोषणा गरेको सेवालाई अझ प्रभावकारी बनाउन सक्रिय रूपमा लागिपर्ने प्रतिबद्धता व्यक्त गरेका छन्।
