विराटनगर –जिल्ला प्रहरी कार्यालय मोरङले जिल्लाभर सञ्चालन गरेको ‘स्वीप अपरेशन’ अन्तर्गत ७२ जनालाई नियन्त्रणमा लिएको छ।प्रहरीका अनुसार लागूऔषधको अवैध कारोबार तथा सेवन, चोरी–डकैती, गुन्डागर्दी, समाजमा अशान्ति फैलाउने गतिविधि तथा शंकास्पद रूपमा राति हिँडडुल गर्ने व्यक्तिहरूलाई लक्षित गर्दै विशेष अभियान सञ्चालन गरिएको हो।
यो अपरेशन बिहीबार बेलुका ६ बजेदेखि सुरु भई शुक्रबार बिहान ६ बजेसम्म निरन्तर सञ्चालन गरिएको थियो। सो अवधिमा जिल्लाका विभिन्न वडा तथा संवेदनशील क्षेत्रहरूमा निगरानी बढाउँदै सर्च अभियान चलाइएको थियो।
अभियानका क्रममा ७२ जनालाई नियन्त्रणमा लिइएको प्रहरीले जनाएको छ। उनीहरूको पृष्ठभूमि तथा गतिविधिबारे थप अनुसन्धान भइरहेको छ भने आवश्यक कानुनी कारबाही प्रक्रिया अगाडि बढाइएको जिल्ला प्रहरी कार्यालय मोरङले जानकारी दिएको छ।
प्रहरीले यस्तो अभियानले जिल्लामा शान्ति सुरक्षा कायम गर्न सहयोग पुग्ने विश्वास व्यक्त गरेको छ।
