काठमाडौं – सुकुमवासी बस्ती खाली गराउने सरकारको निर्णयविरुद्ध थापाथली क्षेत्रमा प्रदर्शन भइरहेको छ।स्थानीयहरूले नेपाल सरकार विरुद्ध नाराबाजी गर्दै ‘डोजर आतंक बन्द गर’, ‘आवासको हक सुनिश्चित गर’ जस्ता नारा लगाइरहेका छन्।
प्रदर्शनका क्रममा रवि लामिछानेको पुरानो अभिव्यक्तिलाई पनि उठाइएको छ। उनले पहिले सुकुमवासी बस्तीमा डोजर चलाए आफू विरोधमा उभिने बताएका थिए। अहिले भने बालेन्द्र शाह नेतृत्वको सरकारले बस्ती हटाउने निर्णय गरेपछि युवाहरू आक्रोशित बनेका छन्।
सरकारले थापाथली, शंखमूल, शान्तिनगर र मनोहरा क्षेत्रका बस्ती खाली गराउन बिहीबारदेखि माइकिङ गरेको थियो। केहीले सामान सार्न थालेका छन् भने केही स्थानीय र युवाहरू विरोधमा उत्रिएका छन्।प्रदर्शन राष्ट्रिय जेनजी नागरिक अभियान को अगुवाइमा भइरहेको छ। प्रदर्शनकारीहरूले थापाथलीदेखि माइतीघर मण्डलासम्म र्याली निकाल्ने तयारी समेत गरेका छन्।
यसअघि प्रमुख जिल्ला अधिकारी ईश्वरराज पौडैलको नेतृत्वमा बसेको जिल्ला सुरक्षा समितिको बैठकले बस्ती खाली गराउने निर्णय गरेको थियो, जसमा कार्यवाहक मेयर सुनिता डंगोल लगायत सहभागी थिए।
सरकारले पहिलो चरणमा चार बस्तीमा डोजर चलाउने तयारी गरेको छ। सूचना पाएपछि केहीले सामान सारिरहेका छन् भने केहीले भने बस्ती नछाड्ने अडान लिएका छन्।
