काठमाडौं – श्रम संस्कृति पार्टीका अध्यक्ष हर्क साम्पाङ र प्रलोपा छोडेर स्वतन्त्र भएका सुदन किराती बीच पार्टी एकताको विषयमा छलफल भइरहेको छ।
दुवै नेताबीच एउटै पार्टीमा जाने सम्भावनाबारे विभिन्न चरणमा कुराकानी भइरहेको स्रोतहरूले बताएका छन्। सुदनले पनि हर्कसँग विभिन्न कोणबाट छलफल भइरहेको स्वीकारेका छन्, तर अन्तिम निर्णय भने भइसकेको छैन।
सुदनसहित केही नेताहरू श्रम संस्कृति पार्टीमा समावेश हुन सक्ने चर्चा छ। हर्कले सुदनलाई पार्टीमा ल्याएपछि वरिष्ठ नेताको जिम्मेवारी दिने र आगामी चुनावपछि कोशी प्रदेशको मुख्यमन्त्री उम्मेदवार बनाउनेसम्मका चर्चा चलिरहेका छन्। तर यसबारे दुवै पक्षले औपचारिक पुष्टि गरेका छैनन्।
यस्तै, सुदनसँगै प्रलोपा पुगेका सन्तोष परियार पनि उक्त पार्टीतर्फ जान सक्ने अनुमान गरिएको भए पनि उनले आफूले पार्टी नछाडेको बताएका छन्।
हाल ललितपुरको नख्खीपोटस्थित किरात राई यायोख्याको भवनमा श्रम संस्कृति पार्टीको बैठक बसिरहेको छ, जहाँ सुदन लगायत नेताहरूलाई पार्टीमा भित्र्याउने विषयमा छलफल भइरहेको जनाइएको छ।
