काठमाडौं – सिंहदरबार स्थित प्रधानमन्त्री तथा मन्त्रिपरिषद् कार्यालयमा बसेको मन्त्रिपरिषद् बैठक बिहीबार सम्पन्न भएको छ।
बैठकले तीन वटा महत्वपूर्ण निर्णय गरेको छ। पहिलो, इन्टिग्रेटेड वाटर सप्लाई तथा सिउरेज व्यवस्थापन परियोजनाका लागि एशियाली विकास बैंकबाट प्राप्त हुने ११५ मिलियन अमेरिकी डलर सहुलियत ऋणका लागि वार्ता गर्न अर्थ मन्त्रालयका सहसचिवको नेतृत्वमा टोली गठन गरिएको छ।
दोस्रो, सरकारी निकायका सफ्टवेयर र सूचना प्रविधि प्रणालीबारे अध्ययन गर्न सूचना तथा सञ्चार प्रविधि सल्लाहकारको संयोजकत्वमा कार्यदल गठन गर्ने निर्णय गरिएको छ। यसबारे जानकारी शिक्षामन्त्री सस्मित पोखरेलले दिएका छन्।
तेस्रो, महाराजगन्जस्थित राष्ट्रिय प्रहरी प्रशिक्षण प्रतिष्ठानको जग्गा राष्ट्रपतिको कार्यालयमा हस्तान्तरण गर्ने पुरानो निर्णय खारेज गर्दै उक्त जग्गा पुनः प्रतिष्ठानले नै प्रयोग गर्ने निर्णय गरिएको छ।
