पोखरा – पोखराका विभिन्न क्षेत्रमा बुधबार राति प्रहरीले ठूलो मात्रामा ‘स्वीप अपरेसन’ सञ्चालन गरेको छ।
जिल्ला प्रहरी कार्यालय कास्कीको नेतृत्वमा काहुँडाँडा, लेकसाइड, रामबजार, लेखनाथलगायत क्षेत्रमा रातभर विशेष अभियान चलाइएको थियो। राति ९ बजेदेखि बिहान ५ बजेसम्म करिब १०० जना प्रहरी परिचालन गरिएको थियो।
प्रहरी प्रमुख नवीन कार्कीका अनुसार टोले गुण्डागर्दी, लागुऔषध कारोबार तथा प्रयोग, र समाजमा अशान्ति फैलाउने गतिविधि नियन्त्रण गर्न यो अपरेसन गरिएको हो।
यस क्रममा एकै रात १२२ जना पक्राउ परेका छन्। केहीलाई सोधपुछपछि छोडिएको प्रहरीले जनाएको छ भने अन्यको पृष्ठभूमि र गतिविधिबारे अनुसन्धान भइरहेको छ।
नयाँ वर्ष २०८३ सुरु भएयता यति ठूलो संख्यामा गरिएको पक्राउ पहिलो पटक हो। प्रहरीले पोखरामा लागुऔषध र गुण्डागर्दीका घटना बढ्दै गएपछि यस्तो कडाइ गरेको जनाएको छ।
