Pic : CAN काठमाडौं । कीर्तिपुरस्थित त्रिवि क्रिकेट मैदान मा जारी दोस्रो ट्वान्टी–२० अन्तर्राष्ट्रिय खेलमा नेपालले उत्कृष्ट बलिङ गर्दै युएई लाई मध्यम स्कोरमा रोक्न सफल भएको छ।
सन्दीप लामिछाने र हेमन्त धामीको उत्कृष्ट प्रदर्शनका कारण युएई निर्धारित २० ओभरमा ८ विकेट गुमाउँदै १२८ रनमा सीमित भयो। अब नेपालले जितका लागि १२९ रनको लक्ष्य पछ्याउनेछ।
नेपालका लागि सन्दीपले घातक र किफायती बलिङ गर्दै ४ ओभरमा १ मेडनसहित मात्र ६ रन खर्चेर ३ विकेट लिए। यस्तै, हेमन्तले ४ ओभरमा २० रन दिएर २ विकेट लिए र विपक्षी कप्तान मोहम्मद वसिम लाई शून्यमै आउट गर्दै सुरुवातमै दबाब सिर्जना गरे। त्यस्तै, नन्दन यादव र शाहब आलमले पनि १–१ विकेट लिए।
एक समय ४८ रनमै ६ विकेट गुमाएर संकटमा परेको युएईका लागि अक्षदीप नाथ र मोहम्मद अरफान ले उत्कृष्ट पुनरागमन गराए। अक्षदीपले ४२ बलमा ३ चौका र ४ छक्का प्रहार गर्दै अविजित ५३ रन बनाए भने अरफानले ३२ रन जोडे। अदीब उस्मानीले ३० रन बनाए।
यी तीन खेलाडीबाहेक अन्य कुनै पनि ब्याटरले दोहोरो अंकमा रन बनाउन सकेनन्।
पहिलो खेलमा पराजित भएको नेपालका लागि सिरिज जोगाउन यो खेल जित्नै पर्ने दबाब रहेको छ। केही बेरमै नेपालले लक्ष्य पछ्याउँदै जवाफी ब्याटिङ सुरु गर्नेछ।
