काठमाडौं । विश्वविद्यालयका उपकुलपतिहरूले दलीय भ्रातृ विद्यार्थी संगठनहरूको अराजक गतिविधिका कारण काम गर्ने वातावरण प्रभावित भएको भन्दै प्रधानमन्त्री बालेन्द्र शाह समक्ष गुनासो गरेका छन्।सोमबार भएको छलफलमा ११ वटा विश्वविद्यालयका उपकुलपतिहरूले विश्वविद्यालय परिसरभित्र बढ्दो राजनीतिक हस्तक्षेपका कारण प्रशासनिक तथा शैक्षिक मर्यादा कायम गर्न कठिन भएको बताएका हुन्। उनीहरूले विद्यार्थी संगठनका नेता–कार्यकर्ताको दबाब र अराजक शैलीले दैनिक कामकाजमा समेत असर परेको उल्लेख गरे।
उपकुलपतिहरूको गुनासो सुनेपछि प्रधानमन्त्री शाहले विश्वविद्यालयलाई दलीय राजनीतिबाट मुक्त बनाउने प्रतिबद्धता जनाएका छन्। उनले विश्वविद्यालयका कोठा, भवन तथा जमिन ओगटेर बसेका दलगत भ्रातृ संगठनका कार्यालयहरू आवश्यक परे सुरक्षाकर्मी परिचालन गरेर हटाउन निर्देशन दिएका छन्।
त्यसैगरी, उनले विश्वविद्यालयको साख जोगाउन र विद्यार्थीको भविष्यप्रति संवेदनशील हुन उपकुलपतिहरूलाई आग्रह गरेका छन्। स्नातकदेखि स्नातकोत्तर तहसम्मका सबै परीक्षाको नतिजा एक महिनाभित्र सार्वजनिक गर्न र त्रिभुवन विश्वविद्यालय बाट अन्य विश्वविद्यालयले लिनुपर्ने समकक्षताको जटिल प्रक्रिया तत्काल अन्त्य गर्न पनि निर्देशन दिएका छन्।
विश्वविद्यालयलाई प्राज्ञिक थलोका रूपमा विकास गर्नुपर्नेमा जोड दिँदै प्रधानमन्त्रीले कुनै पनि प्रकारको राजनीतिक हस्तक्षेप स्वीकार्य नहुने स्पष्ट पारेका छन्।
