काठमाडौं । नेपाली कांग्रेसको केन्द्रीय अनुशासन समितिले निवर्तमान कार्यवाहक सभापति पूर्णबहादुर खड्कासँग सोधिएको स्पष्टीकरण फिर्ता लिने भएको छ।
सानेपामा सोमबार दिउँसो बस्ने अनुशासन समितिको बैठकले खड्कालाई सोधिएको सात दिने स्पष्टीकरण फिर्ता लिने निर्णय गर्ने तयारी गरेको हो। यसअघि २ वैशाखमा बसेको बैठकले उनीसँग स्पष्टीकरण माग्ने निर्णय गरेको थियो।
विशेष महाधिवेशनबाट आएको नेतृत्वलाई अदालतले मान्यता दिएपछि स्पष्टीकरणको औचित्यता समाप्त भएको ठहर गर्दै उक्त निर्णय फिर्ता लिन लागिएको बताइएको छ।
यद्यपि, खड्काले यसअघि नै अनुशासन समितिको निर्णयलाई ‘अवैधानिक’ भन्दै अस्वीकार गरेका थिए। उनले उक्त निर्णयलाई निरर्थक, हास्यास्पद र अर्थहीन भएको टिप्पणी गरेका थिए।
