काठमाडौं । नेकपा एमालेका नेता तथा पूर्व पररास्ट्रमन्त्री प्रदीप ज्ञवालीले विश्वविद्यालयहरूमा विद्यार्थी संगठनका गतिविधि र उपस्थितिमाथि रोक लगाउने निर्णयको कडा विरोध गरेका छन्।सोमबार सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले स्वतन्त्र विद्यार्थी युनियन (स्ववियु) को अधिकार खोस्ने कदमलाई चरम अलोकतान्त्रिकको संज्ञा दिएका हुन्।
विश्वविद्यालयभित्र ‘सुरक्षा युनिट’ स्थापना गर्ने तयारीप्रति आपत्ति जनाउँदै उनले यसलाई प्राज्ञिक स्वायत्ततामाथिको ठाडो हस्तक्षेप बताएका छन्। पञ्चायती निरंकुशतामा समेत यस्तो निर्णय हुन नसकेको उल्लेख गर्दै उनले उपकुलपतिहरूले यस्तो निर्णयमा हस्ताक्षर गर्नु आश्चर्यजनक भएको बताएका छन्।
‘संवाद र रूपान्तरण आवश्यक, निषेध होइन’ भन्ने धारणा राख्दै ज्ञवालीले विद्यार्थी आन्दोलनमा केही कमजोरी रहेको स्वीकार गरेका छन्। उनका अनुसार विद्यार्थी आन्दोलनले आम विद्यार्थीको हित, शैक्षिक गुणस्तर अभिवृद्धि र स्वस्थ वातावरण निर्माणमा ‘प्रेरक’ (क्याटालिस्ट) को भूमिका खेल्नुपर्ने भए पनि कहिलेकाहीँ मूल मुद्दाबाट विचलित भएको देखिन्छ।
तर, कमजोरीकै आधारमा विद्यार्थी संगठनलाई निषेध गर्नु समाधान नभएको उनले प्रस्ट पारे। “समाधान त संवाद, रचनात्मक सहकार्य र विद्यार्थी आन्दोलनको रूपान्तरणमा छ,” उनले उल्लेख गरेका छन्।
सरकारको कदमप्रति उनले व्यंग्यात्मक प्रश्न गर्दै भनेका छन्, “के कपालमा चायाँ परेको भन्दै गर्धन नै छिनाउनु उचित हुन्छ ?”
ज्ञवालीले विद्यार्थी संगठनको अस्तित्व नै मेट्ने प्रयास नगरी सुधार र सहकार्यमार्फत शैक्षिक प्रणाली सुदृढ बनाउनुपर्नेमा जोड दिएका छन्।
