विराटनगर । म्याजिक फुटवेयरले नेपाली जुत्ता उद्योगमा नयाँ उचाइ हासिल गरेको छ । पछिल्लो एक आर्थिक वर्षमा एक अर्ब ४८ करोडको निर्यात गर्दै म्याजिक फुटवेयर नेपालकै नम्बर १ फुटवेयर कम्पनीका रूपमा पुरस्कृत भएको छ ।
आर्थिक वर्ष २०८१/८२ मा एक सय ४८ करोड रुपैयाँ बराबरको जुत्ता निर्यात गर्दै देशकै नम्बर एक फुटवेयर निर्यातकको सम्मान आर्जन गरेको हो । निर्यात व्यवसायी महासंघ नेपाल (फिन) को छैंटौं वार्षिक साधारण सभाको अवसर पारेर केही दिनअगाडि काठमाडौंको लाजिम्पाटस्थित होटल दूषित प्रिन्सेसमा एक विशेष समारोहबीच म्याजिक फुटवेयर सम्मानित भएको हो ।
समारोहमा प्रमुख अतिथिसमेत रहेका प्रतिनिधिसभा सदस्य गणेश पराजुलीले म्याजिक फुटवेयरका निर्देशक राजेशकुमार अगवाललाई सम्मानपत्र प्रदान गरेका थिए ।
पछिल्ला दुई–तीन वर्षदेखि निर्यात विस्तारमा निरन्तर लागिपरेको म्याजिकका निर्देशक अग्रवालले यस उपलब्धिको कदर गर्दै आगामी आर्थिक वर्ष २०८२/८३ मा दुई अर्ब रुपैयाँभन्दा बढी निर्यात गर्ने महत्वाकांक्षी लक्ष्य तय गरिएको बताए । “हामीले निर्यात विस्तारमा ठूलो सम्भावना देखेका छौं,” उनले बताए ।
रोजगारीको दृष्टिकोणले पनि यो क्षेत्र उत्साहजनक छ । म्याजिक फुटवेयरले मात्रै हाल करिब १ हजार ७ सय जनालाई प्रत्यक्ष रोजगारी प्रदान गरिरहेको छ, जुन देशको औद्योगिक विकासका लागि सकारात्मक संकेत हो ।
जुत्ता–चप्पल उद्योगलाई रोजगारमुखी क्षेत्रका रूपमा पनि लिइन्छ । यद्यपि, उद्योगले केही चुनौती पनि सामना गरिरहेको छ। कम मुनाफाका बाबजुद ४–५ प्रतिशत निर्यात अनुदानको आशामा गरिएको लगानीमा सरकारले अनुदान अचानक बन्द गरिएको छ, जसका कारण उद्योगीहरू केही निराश भएका छन् ।
अग्रवाल भन्छन्, ‘मुनाफा न्युन भएता पनि निर्यात अनुदान ४/५ प्रतिशत कै आशमा निर्यात गर्नका लागि लगानी गरेका छौं, तर अचानक अनुदान बन्द भयो । यसले निराश तुल्याएको छ । तर पनि निर्यात वृद्धि र रोजगारी सिर्जनाले भने यो क्षेत्र अझै सम्भावनायुक्त रहेको देखाउँछ ।’
कुनै समय गोल्डस्टर सुज नेपालले एक्लै झन्डै १०० करोड रुपैयाँसम्मको निर्यात गर्दै अग्रणि भूमिका खेलेको थियो । तर भारतमा बढ्दो प्रतिस्पर्धाका कारण अहिले यसको निर्यात करिब ५० करोड रुपैयाँको हाराहारीमा सीमित भएको छ ।
यद्यपि, यसबीचमा म्याजिक फुटवेयरले एक अर्ब ४८ करोडको निर्यात गरेर नेपालको जुत्ता उद्योगमा सकारात्मक परिवर्तन देखाएको छ ।
