टी–२० अन्तर्राष्ट्रिय क्रिकेटमा नेपाल महिला राष्ट्रिय क्रिकेट टोलीले अमेरिका महिला क्रिकेट टोली सँग पहिलोपटक प्रतिस्पर्धा गर्न लागेको हो। यसअघि नेपालले अभ्यास खेल खेले पनि त्यसले टी–२०आई मान्यता पाएको थिएन।
अप्रिल १८ देखि मे १ सम्म सञ्चालन हुने प्रतियोगितामा आयोजक रुवान्डा महिला क्रिकेट टोली सहित नेपाल, अमेरिका, इटाली महिला क्रिकेट टोली र भानुआतु महिला क्रिकेट टोली सहभागी छन्। सबै टोलीले एक–अर्कासँग दुई–दुई पटक खेल्ने (डबल राउण्ड रोबिन) प्रणाली रहेको छ र सबैभन्दा बढी अंक ल्याउने टोली च्याम्पियन बन्नेछ।
नेपाल महिला टोली पहिलोपटक रुवान्डामा खेल्न लागेको हो। अन्तर्राष्ट्रिय क्रिकेट परिषद् (आईसीसी) ले एसोसिएट राष्ट्रहरूलाई अवसर दिन पहिलोपटक यो प्रतियोगिता आयोजना गरेको हो।
वरियताअनुसार सहभागी पाँच टोलीमध्ये नेपाल २१औँ स्थानमा रहेर शीर्ष स्थानमा छ। त्यसपछि इटाली (२३औँ), अमेरिका (२४औँ), रुवान्डा (२५औँ) र भानुआतु (३०औँ) स्थानमा छन्।
नेपालले दोस्रो खेल आइतबार (६ वैशाख) इटालीसँग खेल्नेछ भने त्यसपछि क्रमशः रुवान्डा, भानुआतु र पुनः अमेरिका लगायत टोलीसँग खेल्दै प्रतियोगिता अगाडि बढाउनेछ।
