काठमाडौं । नेपाली कांग्रेसले संसदीय दलको नेता चयनका लागि सांसदहरूलाई छलफलमा बोलाएको छ।संसदीय दलको नेता चयनका लागि गठन गरिएको निर्वाचन समितिले आज दिउँसो ३ बजे बैठक बोलाएको हो। बैठक सिंहदरबार स्थित संसदीय दलको कार्यालयमा बस्नेछ।
कांग्रेसका सहमहामन्त्री प्रकाश रसाइली ‘स्नेही’ निर्वाचन समितिका संयोजक हुन्। उनले प्रत्यक्ष तथा समानुपातिकतर्फ निर्वाचित सांसदहरूलाई छलफलका लागि बोलाएका हुन्।
सांसद भरतबहादुर खड्काले बैठकको एजेण्डा स्पष्ट नभए पनि संसदीय दलको नेता चयनकै विषयमा छलफल हुने अनुमान गरिएको बताए। खड्का स्वयं पनि दलको नेताका आकांक्षीमध्ये एक हुन्।
यसअघि उनलाई सार्वजनिक लेखा समितिको सर्वसम्मत उम्मेदवार बनाइएको छ र उक्त समितिको सभापति बन्ने लगभग निश्चित भएको छ।
कांग्रेसभित्र संसदीय दलको नेताका लागि भीष्मराज आङ्देम्बे, अर्जुननरसिंह केसी, मोहन आचार्य, निश्कल राई लगायतका नाम चर्चामा छन्।
यसअघि समितिले २ गते कार्यतालिका प्रकाशन, ३ गते सर्वसम्मतिको प्रयास र ४ चैतमा नेता चयन गर्ने तयारी रहेको जनाएको थियो। तर, हालसम्म औपचारिक कार्यतालिका सार्वजनिक भएको छैन।
