काठमाडौँ । उपसभामुख रुवि कुमारी ठाकुरले दाइजो लेनदेन हुने विवाहका कार्यक्रममा आफू सहभागी नहुने घोषणा गरेकी छन्। समाजमा अझै पनि दाइजो प्रथा गम्भीर कुरीतिका रूपमा कायम रहेको उल्लेख गर्दै उनले यस्तो अभ्यासलाई सामाजिक र कानुनी रूपमा दण्डनीय अपराधको रूपमा व्याख्या गरेकी छन्।
हालै आफूले प्राप्त गरेका विवाहका निमन्त्रणापत्रहरूमा ‘दहेजमुक्त विवाह’ भन्ने उल्लेख नभएको पाइएपछि उनले सामाजिक सञ्जालमार्फत आफ्नो धारणा सार्वजनिक गरेकी हुन्। “दाइजो लिनु र दिनु मात्र होइन, लेनदेनमा आधारित विवाह स्वीकार गर्नु, त्यस्ता कार्यक्रममा सहभागी हुनु वा भोज ग्रहण गर्नु पनि सामाजिक रूपमा अस्वीकार्य छ,” उनले उल्लेख गरेकी छन्, “यस्तो प्रथाले महिलाको सम्मान, समानता र अधिकारमाथि प्रत्यक्ष आघात पुर्याउँछ।”
उपसभामुख ठाकुरले समाज परिवर्तनको सुरुवात आफैँबाट गर्नुपर्नेमा जोड दिँदै दाइजो भएको विवाहमा आफू उपस्थित हुन नसक्ने स्पष्ट पारेकी छन्। साथै, विवाहको निमन्त्रणापत्र पठाउँदा ‘दहेजमुक्त विवाह’ भन्ने सन्देश स्पष्ट रूपमा समावेश गर्न सबैलाई आग्रह गरेकी छन्।
“विवाह निमन्त्रणापत्रमा ‘दहेजमुक्त विवाह, दाइजो लिनु र दिनु सामाजिक तथा कानुनी अपराध हो’ भन्ने सन्देश राख्न हार्दिक अनुरोध गर्दछु,” उनले आह्वान गरेकी छन्, “आउनुहोस्, हामी सबै मिलेर दाइजोमुक्त समाज निर्माणतर्फ ठोस पाइला चालौँ।”
व्यक्तिगत स्तरबाट सुरु गरिएको सानो प्रयासले पनि ठूलो सामाजिक रूपान्तरण सम्भव हुने विश्वास व्यक्त गर्दै उनले समानता र सम्मानमा आधारित सुसंस्कृत विवाहको अभ्यासलाई प्रोत्साहन गर्न सबैलाई आह्वान गरेकी छन्।
