‘जलवायुका लागि युवाको काम, युवा दिमाग, शक्तिशाली समाधान’ भन्ने नाराका साथ विराटनगरको शिक्षादीप कलेजले यसपटक पनि जलवायु सम्मेलनलाई निरन्तरता दिएको छ । वातावरण संरक्षणका खातिर प्रत्येक वर्ष विभिन्न नाराका साथ एक दिवसीय जलवायु सम्मेलन गर्दै आएको कलेजले आइतबार चौथो संस्करणको सम्मेलन आयोजना गरेको हो ।
दुई चरणमा भएको सम्मेलनमा कलेजको कक्षा ११ मा अध्ययनरत जीव विज्ञान संकायका ५० जना विद्यार्थीले जलवायु परिवर्तनको प्रत्यक्ष असर र अनुसन्धानमुलक समाधानका उपायहरू औंल्याएका थिए । उनीहरूले मिचाहा प्रजातिका वनस्पतिदेखि अम्ल वर्षा, तापमान वृद्धि, प्लास्टिक प्रदुषण, खाद्य सुरक्षादेखि ओजन तहको विनाशलगायतका विषयमा खोजमूलक प्रस्तुतीकरण गरेका हुन् ।
कोशी प्रदेश सरकारको वन, पर्यटन तथा वातावरण मन्त्री भीम पराजुली र पूर्वाञ्चल विश्वविद्यालयका उपकुलपति प्राडा विजुकुमार थपलियाले उद्घाटन गरेको उक्त सम्मेलनमा कलेजमा अध्ययनरत विद्यार्थीहरूलाई नौ समूहमा विभाजन गरिएको थियो ।
सम्मेलनमा कलेजका विज्ञान संकायका विद्यार्थीहरूले गहिरो अनुसन्धान र खोजबाट विषयहरू छनोट गरेर प्रस्तुतीकरण गरेका थिए । खोज अनुसन्धानबाट वातावरण क्षेत्रका समस्या र समाधानका उपायहरूसमेत आफ्नो प्रस्तुतीकरणमा समावेश गरेर उनीहरूले वातावरण संरक्षणमा योगदान गरेको थिए ।
कार्यक्रमको औचित्यमाथि प्रकाश पार्दै कलेजका प्रिन्सिपल ज्ञानबहादुर खड्काले आफ्ना विद्यार्थीहरूलाई वातावरणको क्षेत्रमा धेरै ठुलो चासो रहेको र त्यसका लागि खोज-अनुसन्धान समेत गरेर प्रस्तुतीकरण तयार पारेको बताए । नेपालले पनि जलवायु परिवर्तनको चपेटामा परेर धेरै वातावरणीय असन्तुलन र जोखिमहरू सहनुपरेकोले यस्तो कार्यक्रम दोहोर्याइँदै आइएको भनाइ प्रिन्सिपल खड्काको छ ।
यसैगरी कार्यक्रममा बोल्ने क्रममा पूर्वाञ्चल विश्वविद्यालयका उपकुलपति प्राडा विजुकुमार थपलियाले वर्तमान विश्वमा मौसम परिवर्तनको प्रतिकूल असर पारिरहेको बताउँदै विद्यार्थीहरूले वास्तवमै समस्या समाधानका उपायबारे खोज गरेको बताए ।
कोशी प्रदेश सरकारको वन, पर्यटन तथा वातावरण मन्त्री भीम पराजुलीले जलवायु परिवर्तन भइरहँदा भविष्यमा आउन सक्ने वातावरणीय जोखिमबारे अहिलेदेखि नै गर्नुपर्ने कामबारे विद्यार्थीहरूले जानकारी गराएको उल्लेख गरे ।
वातावरण मन्त्रालयकै सचिव डा. ईन्द्रप्रसाद सापकोटाले विद्यार्थीहरूको प्रस्तुतीकरणले वातावरण प्रदूषणका विश्वव्यापी खास मुद्दाहरूको चर्चा र त्यसका समाधानका बाटोबारे खुलासा गरेको बताए ।
शिक्षादीप कलेजले पछिल्लो चार वर्षदेखि जलवायु सम्मेलन आयोजना गर्दै आइरहेको र यसलाई भावि दिनमा पनि निरन्तरता दिँदै लगिने सम्मेलनका कन्भेनर रामचन्द्र अधिकारीले जानकारी दिए ।
प्राडा शिवकुमार राई मुख्य मूल्यांकनकर्ता रहेको सम्मेलनमा कलेजका चिफ डाइरेक्टर रमेशकुमार मण्डल, सह प्रा. शैलेन्द्र शिवाकोटी, विज्ञान संकायका कोअर्डिनेटर नवीनकुमार राय, व्यवस्थापन संकायका कोअर्डिनेटर शंकर भट्टराई, कन्भेनर डा. ललित नारायण मण्डरलगायतको उपस्थिति रहेको थियो ।
