काठमाडौं – सभामुख डोलप्रसाद अर्यालले प्रतिनिधिसभा नियमावली, २०७९ को नियम ८ बमोजिम उपसभामुख पदको निर्वाचन शुक्रबारका लागि तय गरेका छन्।
संघीय संसद सचिवालयका सचिव हर्कराज राईले सार्वजनिक गरेको कार्यतालिकाअनुसार बिहीबार बिहान ११ बजेदेखि दिउँसो २ बजेसम्म उम्मेदवारी दर्ता गरिनेछ भने सोही दिन २:३० बजे उम्मेदवारको सूची प्रकाशन हुनेछ। शुक्रबार दिउँसो ४ बजे बस्ने प्रतिनिधिसभा बैठकमा निर्वाचन प्रक्रिया अघि बढाइनेछ।
२७५ सदस्यीय प्रतिनिधिसभामा राष्ट्रिय स्वतन्त्र पार्टी (रास्वपा) १८२ सांसदसहित स्पष्ट बहुमतमा रहेको छ। अन्य दलहरूमा कांग्रेसका ३८, एमालेका २५, नेकपाका १७, श्रम संस्कृति पार्टीका ७, राष्ट्रिय प्रजातन्त्र पार्टी का ५ र एक स्वतन्त्र सांसद रहेका छन्।
रास्वपा एक्लै बहुमतमा रहेकाले उसले समर्थन गर्ने उम्मेदवार नै उपसभामुख बन्ने निश्चितजस्तै देखिएको छ। उपसभामुख पदका लागि श्रम संस्कृति पार्टी र राप्रपाको बलियो दाबेदारी रहेको छ।
रास्वपाले अहिलेसम्म आधिकारिक रूपमा समर्थन कसलाई गर्ने भन्ने खुलाएको छैन। स्रोतका अनुसार प्रधानमन्त्री बालेन्द्र शाह श्रम संस्कृति पार्टीको पक्षमा देखिएका छन् भने रास्वपा सभापति रवि लामिछाने राप्रपालाई समर्थन गर्नुपर्ने अडानमा छन्।
यसैबीच, रामचन्द्र पौडेलले शुक्रबार संघीय संसद्को दुवै सदनको संयुक्त बैठकलाई सम्बोधन गर्ने कार्यक्रम तय भएको छ। संविधानको धारा ९५ अनुसार चैत २७ गते दिउँसो ३ बजे सम्बोधन हुने जनाइएको छ।
प्रतिनिधिसभा बैठक शुक्रबार दिउँसो ४ बजे र राष्ट्रियसभा बैठक ४:१५ बजे बस्ने तय गरिएको छ।
