विराटनगरमा पहिलोपटक अन्तर्राष्ट्रिय ब्रान्डको पाँचतारे होटल ‘लेमन ट्री प्रिमियर’ नयाँ वर्ष २०८३ सँगै सञ्चालनमा आउने भएको छ। शुभम् इन्टरनेशनल हस्पिटालिटी प्रा.लि.मार्फत करिब दुई अर्ब रुपैयाँ लगानीमा निर्माण भएको यस होटलमा चार जना युवा उद्यमी—मनोजविक्रम शाह, कविन श्रेष्ठ, विकास चौधरी र प्रशान्त तातेड—को साझेदारी रहेको छ।
होटलको सम्पूर्ण व्यवस्थापन भारतको बहुराष्ट्रिय आतिथ्य कम्पनी लेमन ट्री होटेल्सले गर्नेछ। यससँगै लेमन ट्री ब्रान्डअन्तर्गत नेपालमा यो दोस्रो होटल बन्नेछ, यसअघि काठमाडौंमा सञ्चालनमा आइसकेको छ।
पहिले व्यापारिक मल ‘नेपाल बजार’ विस्तार गर्ने उद्देश्यले खरिद गरिएको भृकुटीचोकस्थित सात कठ्ठा जमिनमा पछि होटल निर्माण गर्ने योजना अघि सारिएको हो। लगानीकर्ता शाहका अनुसार हाल करिब ८० जना कर्मचारीलाई तालिम दिइँदैछ र आगामी बैशाखमा भव्य उद्घाटन गर्ने तयारी गरिएको छ।
आठ तलाको होटलमा कुल ८० वटा कोठा रहनेछन्, जसमा एक प्रेसिडेन्सियल स्वीट, आठ स्वीट, पाँच सुपर डिलक्स र ६६ डिलक्स कोठा समावेश छन्। होटलमा दुई हजार क्षमताको बैंक्वेट हल, रुफटप स्विमिङ पुल, स्पा, साउना बाथ, जिम तथा सिट्रस क्याफे, लाउन्ज बार र अल–डे डाइनिङसहितका तीनवटा रेष्टुरेन्ट सञ्चालनमा रहनेछन्।
यो होटल विशेषगरी नेपाल तथा भारतका पर्यटकलाई लक्षित गरिएको छ। विशेष रूपमा बिहार, पश्चिम बंगाल र आसाम क्षेत्रबाट आउने पाहुनालाई आकर्षित गर्ने अपेक्षा गरिएको छ।
