भद्रपुर – भद्रपुर नगरपालिका–४ डाँगीबारी क्षेत्रबाट ठूलो परिमाणमा लागूऔषध ब्राउन सुगर र विभिन्न देशका मुद्रा सहित २ जनालाई प्रहरीले पक्राउ गरेको छ।
चैत २२ गते दिउँसो विशेष सूचनाको आधारमा वडा प्रहरी कार्यालय भद्रपुरबाट खटिएको टोलीले शंकास्पद अवस्थामा रहेका भद्रपुर–४ का बब्लु मर्डी र बिर्तामोड–१ का अनमोल गजमेर लाई नियन्त्रणमा लिएको हो।
प्रहरीका अनुसार उनीहरूको साथबाट २१८ ग्राम ५०० मिलिग्राम ब्राउन सुगर, नेपाली रुपैयाँ ३ लाख २ सय ५०, अमेरिकी डलर ७५, भारतीय रुपैयाँ ५३०, पाकिस्तानी रुपैयाँ ५० र अस्ट्रेलियन डलर ५ बरामद गरिएको छ।
यसैक्रममा कन्काई नगरपालिका–९ का देवुलाल राजबंशी, प्रमोद मल्लिक र श्याम चौधरी लाई १ ग्राम ७५० मिलिग्राम ब्राउन सुगरसहित इलाका प्रहरी कार्यालय अनारमनीले नियन्त्रणमा लिएको छ।
लागूऔषधसहित पक्राउ परेका सबै व्यक्तिहरूमाथि आवश्यक कानुनी कारबाही तथा थप अनुसन्धान भइरहेको प्रहरीले जनाएको छ।
