काठमाडौं – नेपाली कांग्रेसको आधिकारिकता सम्बन्धी विवादबारे सर्वोच्च अदालत मा आज पेसी तोकिएको छ। यो मुद्दा १२औँ नम्बरमा राखिएको छ।
यसअघि चैत १ गते पेसी तोकिए पनि पालो नआएका कारण सुनुवाइ सरेको थियो। सो समयमा रिट दायरकर्ता पूर्व उपसभापति पूर्ण बहादुर खड्का बहसका लागि अदालत पुगेका थिए।
आजको सुनुवाइका लागि दुवै पक्षका कांग्रेस नेताहरू अदालतमा उपस्थित हुने भएका छन्। उपसभापति विश्व प्रकाश शर्मा पनि बहसका लागि सर्वोच्च अदालत जाने तयारीमा छन्।
विशेष महाधिवेशनबाट गगन थापा सभापति चयन भएपछि र निर्वाचन आयोगले त्यसलाई मान्यता दिएपछि असन्तुष्ट पक्षका खड्काले उक्त निर्णयविरुद्ध रिट दायर गरेका थिए।
रिटमा सभापति गगन थापा, उपसभापति विश्वप्रकाश शर्मा तथा निर्वाचन आयोगलाई विपक्षी बनाइएको छ। यस मुद्दाको सुनुवाइले कांग्रेसभित्रको नेतृत्व विवादमा महत्वपूर्ण प्रभाव पार्ने अपेक्षा गरिएको छ।
