काठमाडौं । नेपाली कांग्रेसले आज (शनिबार)देखि १५औं महाधिवेशनको प्रक्रिया अगाडि बढाउने भएको छ। पछिल्लो केन्द्रीय कार्यसमिति बैठकको निर्णयअनुसार पार्टीले महाधिवेशनको तयारी औपचारिक रूपमा सुरु गर्न लागेको हो।
प्रतिनिधिसभा निर्वाचनपछि १०–११ चैतमा बसेको केन्द्रीय कार्यसमिति बैठकले आगामी असोज १६–१९ गते महाधिवेशन सम्पन्न गर्ने कार्यतालिका पारित गरेको थियो। कार्यतालिकाअनुसार २१ चैतदेखि मसान्तसम्म केन्द्रबाट सदस्यता फारम वडा तहसम्म पठाइने र सदस्यता वितरणका लागि १६५ वटै निर्वाचन क्षेत्रमा प्रतिनिधि खटाइनेछ।
कांग्रेसले देशभर क्रियाशील सदस्यता वितरणका लागि खटिने प्रतिनिधिहरूलाई आज ‘ओरिएन्टेसन’ दिने कार्यक्रम राखेको छ। कार्यवाहक मुख्यसचिव कृष्णप्रसाद दुलालका अनुसार दिउँसो २ बजे सानेपामा उक्त कार्यक्रम आयोजना हुनेछ।
प्रतिनिधिहरूको नाम भने अझै सार्वजनिक गरिएको छैन। ‘ओरिएन्टेसन’ पछि उनीहरूको नाम सार्वजनिक गरिने दुलालले जानकारी दिएका छन्। साना जिल्लामा एक जना र ठूला जिल्लामा दुई जना प्रतिनिधि खटाइने तयारी छ।
महाधिवेशनका लागि कांग्रेसले वैशाख १ गतेदेखि मसान्तसम्म देशभरका वडाबाट क्रियाशील सदस्यता वितरण र अद्यावधिक गर्ने योजना बनाएको छ। यसका लागि एक महिने सदस्यता अद्यावधिक अभियान सञ्चालन गरिनेछ। उक्त अभियानपछि वडाहरूले १५ जेठसम्म सदस्यता प्रतिनिधिसभा क्षेत्र र जिल्लामा पठाइसक्नुपर्नेछ भने क्षेत्र र जिल्लाले २५ जेठसम्म सदस्यता विवरण केन्द्रमा पठाइसक्नुपर्ने कार्यतालिका छ।
केन्द्रले सदस्यतामा आवश्यक छानबिन गरेर १५ असारसम्म अन्तिम टुंगो लगाउने र असार मसान्तसम्म अद्यावधिक क्रियाशील सदस्यको नामावली केन्द्रीय निर्वाचन समितिलाई बुझाइसक्ने योजना कांग्रेसले बनाएको छ।
