काठमाडौं – काठमाडौं उपत्यकामा बढ्दो गुण्डागर्दी र बिचौलियाको प्रभाव नियन्त्रण गर्न प्रहरीले व्यापक अपरेसन सञ्चालन गर्दै १७ जनालाई पक्राउ गरेको छ। अपराध अनुसन्धान कार्यालयका अनुसार विभिन्न आपराधिक गतिविधिमा संलग्न रहेको आरोपमा १३ जनालाई नियन्त्रणमा लिइएको हो।
पक्राउ पर्नेमा अशोक गरी, सञ्जीव लामा, सुरेश गुरुङ, किमजोङ बोस लगायत रहेका छन्। उनीहरू विभिन्न आपराधिक सञ्जालसँग जोडिएको आशंकामा अनुसन्धानको दायरामा ल्याइएको प्रहरीले जनाएको छ।
यस्तै, जिल्ला प्रहरी परिसर काठमाडौंले पनि थप ४ जनालाई पक्राउ गर्दै अनुसन्धान अघि बढाएको छ। पक्राउ पर्नेमा श्याम लामा समूहसँग आवद्ध प्रविण गुरुङ, बाफल क्षेत्रमा गुण्डागर्दी गर्दै आएका बिर्जु महर्जन, कलंकी क्षेत्रका सुनज कार्की तथा स्यूचाटारका सरु हुमागाईं रहेका छन्।
प्रहरीका अनुसार पछिल्लो समय सरकारी कार्यालयहरूमा बिचौलियाको चलखेल बढेको गुनासो आएपछि यस्तो अपरेसन तीव्र बनाइएको हो। सेवा प्रवाहमा अवरोध पुर्याउने, अवैध रूपमा रकम असुल गर्ने तथा नेटवर्क बनाएर काम गर्ने बिचौलियाहरूलाई लक्षित गर्दै अनुसन्धान अघि बढाइएको प्रहरीले जनाएको छ।
यस अभियानलाई अझै विस्तार गर्दै अन्य संलग्न व्यक्तिहरूको खोजी भइरहेको र आवश्यक परे थप पक्राउसमेत गरिने प्रहरीले संकेत दिएको छ।
