काठमाडौं – नेपाली कांग्रेसका नेता तथा निवर्तमान गृहमन्त्री रमेश लेखक विरुद्ध जारी अनुसन्धानका लागि अदालतले थप दुई दिन हिरासत म्याद दिएको छ।
जिल्ला अदालत काठमाडौंका न्यायाधीश पुरुषोत्तम खतिवडा क्षेत्रीको इजलासले अनुसन्धान जारी राख्न प्रहरीलाई अनुमति दिएको हो।
भदौ २३–२४ मा भएको जेन-जी आन्दोलनका क्रममा भएको हिंसात्मक घटनामा संलग्नताको आरोपमा गत शनिबार पक्राउ परेका लेखकको बिहीबारदेखि बयान लिन सुरु गरिएको छ। यसअघि जिल्ला प्रहरी परिसरले उनलाई पाँच दिन हिरासतमा राख्न अनुमति लिएको थियो।
यसपटक भने अदालतबाट दोस्रो म्याद भिडियो कलमार्फत लिइएको छ। हाल उनी जिल्ला प्रहरी परिसर काठमाडौंको हिरासतमा रहेका छन्।
उक्त आन्दोलनमा भएको दमन र क्षतिका विषयमा छानबिन गर्न गौरीबहादुर कार्कीको संयोजकत्वमा बनेको आयोगको सिफारिसपछि प्रहरीले लेखकलाई ज्यानसम्बन्धी कसुरमा पक्राउ गरेको हो।
