काठमाडौं – काठमाडौंका प्रमुख जिल्ला अधिकारी ईश्वरराज पौडेल ले विरोधपत्र बुझाउन पुगेका एमाले नेता–कार्यकर्ताहरूलाई राजनीतिक विषयमा आफूहरू प्रवेश नगर्ने स्पष्ट पारेका छन्।
शनिबार पक्राउ परेका एमाले अध्यक्ष केपी शर्मा ओली को रिहाइको माग गर्दै एमालेले देशभरका जिल्ला प्रशासन कार्यालयमार्फत विरोधपत्र बुझाउने कार्यक्रम राखेको थियो। सोही क्रममा नेता रामेश्वर फुयालसहितको टोली जिल्ला प्रशासन कार्यालय काठमाडौं पुगेको थियो।
विरोधपत्र बुझ्दै सीडीओ पौडेलले भने, “राजनीतिक विषयमा हामी बिल्कुलै प्रवेश गर्दैनौं। हाम्रो न्युट्रालिटी र प्रोफेसनालिजमअनुसार हामी अघि बढ्छौं।”
उनले प्रदर्शनका क्रममा भएका केही हिंसात्मक घटनाप्रति ध्यानाकर्षण गराउँदै त्यसमा संलग्नलाई कानुनअनुसार कारबाही गरिने पनि बताए।
सीडीओको उक्त भनाइपछि एमालेतर्फका एक नेताले यो विषय केवल राजनीतिक नभई कानुनीसमेत भएको प्रतिक्रिया दिएका थिए। तर पौडेलले यसबारे थप बहस नगर्ने जवाफ दिएका थिए।
