काठमाडौं – प्रहरीले ज्यानसम्बन्धी कसुरमा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई थुनामा राखेर अनुसन्धान गर्न जिल्ला अदालतमा म्याद थपको माग गरेको छ।
प्रहरीले उनीहरूलाई हिरासतमा राख्नुपर्ने कारणसहित अदालतसमक्ष निवेदन पेस गरेको हो। कानुनी प्रावधानअनुसार म्याद थपका लागि आरोपीलाई अदालतमा उपस्थित गराउनुपर्ने हुन्छ।
हाल त्रिवि शिक्षण अस्पतालमा उपचाररत रहेका ओलीलाई भर्चुअल माध्यमबाट अदालतमा उपस्थित गराइने तयारी गरिएको छ भने लेखकलाई भने प्रत्यक्ष रूपमा अदालतमा उपस्थित गराइएको छ।
उक्त मुद्दामा न्यायाधीश आनन्दप्रसाद श्रेष्ठको इजलासले थुनामा राख्न म्याद दिने वा नदिने निर्णय गर्नेछ।
जेन–जी आन्दोलनमा दमन गरेको आरोपमा प्रहरीले शनिबार बिहान उनीहरूलाई घरबाटै पक्राउ गरेको थियो। गौरीबहादुर कार्की नेतृत्वको जाँचबुझ आयोगले लापरबाहीपूर्वक ज्यान मारेको कसुरमा मुद्दा चलाउन सिफारिस गरेको छ, जसमा दोषी ठहर भए अधिकतम १० वर्षसम्म कैद सजाय हुन सक्ने व्यवस्था छ।
