काठमाडौं – गत २३ र २४ भदौको घटनाको छानबिनका लागि बनेको जाँचबुझ आयोगको प्रतिवेदन जिल्ला प्रहरी परिसर काठमाडौं पुगेको छ।
पूर्वन्यायाधीश गौरीबहादुर कार्की नेतृत्वको उक्त प्रतिवेदन कार्यान्वयन गर्ने निर्णय सरकारले गरिसकेको छ। सो प्रतिवेदन प्रधानमन्त्री तथा मन्त्रिपरिषद् कार्यालय हुँदै गृहमन्त्रालय पुगेको थियो।
गृहमन्त्रालयले कार्यान्वयनका लागि प्रहरी प्रधान कार्यालय लाई निर्देशन दिएको थियो। त्यसपछि काठमाडौं उपत्यका प्रहरी कार्यालय रानिपोखरी हुँदै प्रतिवेदन जिल्ला प्रहरी परिसर काठमाडौं पुगेको हो।
परिसरका प्रवक्ता तथा एसपी पवनकुमार भट्टराईले प्रतिवेदन प्राप्त भएको पुष्टि गर्दै अब कार्यान्वयनको चरणमा जाने बताएका छन्। यसैबीच प्रतिवेदन कार्यान्वयन गर्ने निर्णयसँगै पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक लाई पक्राउ गरिएको छ।
अन्य सुरक्षासम्बन्धी निकायका विषयमा भने थप छानबिनपछि कारबाही गरिने बताइएको छ। जनेजी आन्दोलनका क्रममा भएको हत्यासम्बन्धी घटनामा संलग्न रहेको भन्दै कार्की आयोगले ओली र लेखकविरुद्ध ज्यानसम्बन्धी कसुरमा कारबाही सिफारिस गरेको थियो।
