काठमाडौं – नेपाल प्रहरीले नेकपा एमाले द्वारा घोषित देशव्यापी प्रदर्शनलाई मध्यनजर गर्दै आइतबार बिहान ८ बजेदेखि देशभरका सुरक्षा निकायलाई ‘स्ट्याण्डबाई’ अवस्थामा राखेको छ। संवेदनशील क्षेत्रमा निगरानी बढाइएको छ भने सशस्त्र प्रहरी बल नेपाल को गस्तीसमेत तीव्र पारिने भएको छ।
पूर्वप्रधानमन्त्री केपी शर्मा ओली र पूर्व गृहमन्त्री रमेश लेखक पक्राउको विरोधमा एमालेले शनिबारदेखि नै सडक आन्दोलन सुरु गरिसकेको छ। एमालेले आइतबार देशभरका जिल्ला प्रशासन कार्यालयमा ज्ञापनपत्र बुझाउने कार्यक्रम तय गरेसँगै सुरक्षा चुनौती बढ्ने आकलन गरिएको छ। सोही अनुसार निषेधित क्षेत्र, सरकारी संरचना तथा विशिष्ट व्यक्तिको सुरक्षामा उच्च सतर्कता अपनाइएको छ।
प्रहरी प्रवक्ता डीआईजी अबिनारायण काफ्लेका अनुसार विकसित परिस्थितिलाई ध्यानमा राख्दै आवश्यक जनशक्ति परिचालन गर्न मातहतका सबै युनिटलाई सतर्क बनाइएको छ। यसबीच देशभरका प्रहरी कर्मचारीलाई अत्यावश्यक बाहेक बिदा नदिन निर्देशन दिइएको छ भने गण, गुल्म तथा तालिम केन्द्रका जनशक्तिलाई समेत तयारी अवस्थामा राखिएको छ।
काठमाडौं उपत्यकामा निषेधित क्षेत्र र मुख्य स्थानहरूमा थप सुरक्षा घेरा कडा बनाइएको छ। सम्भावित भिड नियन्त्रणका लागि आवश्यक उपकरण, जनशक्ति र रणनीति तयारी अवस्थामा राखिएको प्रहरीले जनाएको छ।
