काठमाडौं । काठमाडौंका तत्कालीन प्रमुख जिल्ला अधिकारी छविलाल रिजालले भदौ २३ गते भएको घटनामा घुँडाभन्दा तल मात्रै रबरको गोली चलाउन मौखिक आदेश दिएको बताएका छन्।
पूर्वन्यायाधीश गौरीबहादुर कार्की नेतृत्वको छानबिन आयोगलाई दिएको बयानमा रिजालले यस्तो बताएका हुन्। उनका अनुसार आफूले ‘अन्तिम बल’ अर्थात् सिधै गोली चलाउने आदेश भने नदिएको स्पष्ट पारेका छन्।
प्रतिवेदनमा उल्लेख भएअनुसार तनावपूर्ण अवस्थाबीच प्रहरीको रेडियो सेटमार्फत पहिले प्रहरी महानिरीक्षक र त्यसपछि उपत्यका प्रहरी कार्यालयका निमित्त प्रमुखबाट ‘आवश्यकता अनुसार फायर खोल्नू’ भन्ने आदेश आएको आफूले सुनेको उनले बताएका छन्।
रिजालले भदौ २४ गते बिहानदेखि सामाजिक सञ्जालमा आफूविरुद्ध आक्रोश फैलिएको र आफ्नो मृत्यु भएको हल्लासमेत चलाइएको उल्लेख गरेका छन्।
त्यस्तै, गृह मन्त्रालयमा छलफलका क्रममा आफू सिंहदरबार मै सुरक्षित नरहेको सूचना पाएपछि दिउँसो करिब १:४५ बजे नेपाली सेना को नरसिंहदल गणमा गई बसेको बताएका छन्।
