काठमाडौं । बालेन शाहले २३ भदौमा भएको जेन–जीको शान्तिपूर्ण र्यालीमा आफ्नो समर्थन रहेको तर आन्दोलनमा संलग्न नरहेको बताएका छन्। उनले गौरीबहादुर कार्की आयोग समक्ष दिएको बयानमा यस्तो उल्लेख गरेका हुन्।
बयानअनुसार २३ र २४ भदौमा उनी लैनचौरस्थित सरकारी निवासमै रहेका थिए। ‘२३ गतेको शान्तिपूर्ण र्यालीमा मेरो समर्थन थियो, तर आन्दोलनमा थिएन,’ उनले बताएका छन्।
व्यवसायी तथा रेष्टुरेन्ट सञ्चालकहरूको आग्रहमा महानगर प्रहरी बलले पानी वितरण गरेको दाबी पनि उनले गरेका छन्। स्थिति तनावपूर्ण बन्दै गएको जानकारी आफूले सञ्चार माध्यमबाट पाएको र सामाजिक सञ्जालमार्फत संयमता अपनाउन अपिल गरेको उनले बताएका छन्।
घटनापछि महानगर प्रहरी र अन्य निकायसँग समन्वय गरी घाइते तथा मृतकका परिवारलाई सहयोग गरिएको पनि उनले उल्लेख गरेका छन्।
२४ भदौको घटना दुःखद भएको भन्दै उनले अत्यधिक बल प्रयोगका कारण अवस्था जटिल बनेको टिप्पणी गरेका छन्। साथै काठमाडौं महानगरपालिकाले समयमै दमकल परिचालन गरी आगलागी नियन्त्रण गरेको दाबी गरेका छन्।
उनका अनुसार राष्ट्रपति र सेनापतिको आग्रहमा आन्दोलनलाई शान्त पार्न आफूले भूमिका खेलेका थिए। उनले घटनाको सम्पूर्ण जिम्मेवारी तत्कालीन सरकार र सहभागी दलहरूले लिनुपर्ने बताएका छन्।
