काठमाडौं । चालु आर्थिक वर्षको पहिलो सात महिनामा नेपालले रु १ खर्ब २३ अर्ब ६७ करोड बराबरको पेट्रोलियम पदार्थ आयात गरेको छ। वीरगञ्ज भन्सार कार्यालय का अनुसार गत आर्थिक वर्षको सोही अवधिको तुलनामा इन्धन आयातमा वृद्धि भएको हो।
पेट्रोलियम पदार्थ आयातबाट रु ५२ अर्ब १५ करोड राजस्व सङ्कलन भएको छ। विवरणअनुसार सो अवधिमा रु ६३ अर्ब ६५ करोड बराबरको ७ लाख २ हजार ३०० किलोलिटर डिजेल आयात गरिएको छ।
त्यसैगरी, रु २५ अर्ब ३० करोड बराबरको २ लाख ९० हजार ३८२ किलोलिटर पेट्रोल र रु २० अर्ब ८५ करोड बराबरको २० करोड २८ लाख २० हजार ९३२ किलोग्राम एलपी ग्यास आयात भएको जनाइएको छ।
इन्धन आयातमा भएको वृद्धिले राजस्व सङ्कलनमा सकारात्मक योगदान पुर्याए पनि व्यापार घाटा बढाउने दबाब भने यथावत् रहेको देखिन्छ।
