काठमाडौं – बजारमा ग्यास अभावको गुनासो भइरहेका बेला फागुन महिनामा भने पछिल्ला तीन महिनायता कै उच्च ग्यास आयात भएको तथ्यांक सार्वजनिक भएको छ।
भन्सार विभागका अनुसार फागुनमा ५१ हजार १९२ टन ग्यास आयात भएको छ। यो पुस र माघ महिनाको तुलनामा बढी हो। पुसमा ४७ हजार ४६० टन र माघमा ४६ हजार २८५ टन ग्यास आयात भएको थियो।
उपभोक्ताले सहज रूपमा ग्यास नपाएको गुनासो बढेपछि नेपाल आयल निगम ले २८ फागुनदेखि आधा सिलिण्डर मात्र वितरण गर्ने नीति अवलम्बन गरेको छ। सामान्यतया जाडोयाममा ग्यासको माग बढ्ने भए पनि यस वर्ष पुस र माघमा आयात अपेक्षाकृत कम देखिएको थियो। साथै खाडी क्षेत्रमा जारी तनावले आपूर्ति प्रणालीमा असर परेको बताइएको छ।
तथ्यांकअनुसार गत वर्षको फागुनको तुलनामा यस वर्ष ३ हजार ४३८ टन बढी ग्यास आयात भएको छ। समग्रमा चालु आर्थिक वर्षको साउनदेखि फागुनसम्म ३ लाख ७२ हजार २८२ टन ग्यास आयात भएको छ, जुन गत वर्षको सोही अवधिभन्दा १० हजार १८७ टन बढी हो।
यसले कुल आयात बढे पनि वितरण र आपूर्ति व्यवस्थापनका कारण उपभोक्ताले अभाव महसुस गरिरहेको देखिएको छ।
