काठमाडौं – २३ र २४ भदौको घटनासम्बन्धी जाँचबुझ आयोगको प्रतिवेदन सार्वजनिक गर्न माग गर्दै माइतीघर मण्डलामा आज पनि प्रदर्शन गरिएको छ।
प्रदर्शनकारीहरूले ‘प्रतिवेदन सार्वजनिक गर्न साइत कुर्नुपर्ने हो कि हस्तक्षेप?’, ‘कार्की आयोग २०८२ जेनजेड गुमराहमा’ र ‘आवाज एक, दोषी अनेक’ जस्ता नारा लेखिएका प्लेकार्ड र ब्यानरसहित विरोध जनाएका छन्।
प्रदर्शनमा सहभागी युवाहरूले सडक नाटकमार्फत सरकारको आलोचना गर्दै प्रतिवेदन सार्वजनिक गर्न दबाब दिएका छन्। नाटकमा प्रधानमन्त्री सुशीला कार्की र जेनजी आन्दोलनका पीडित परिवारको भूमिकालाई प्रतीकात्मक रूपमा प्रस्तुत गरिएको थियो।
प्रदर्शनमा सहभागी एक सदस्यका अनुसार, नाटकमार्फत वर्तमान अवस्थालाई यथार्थ रूपमा देखाउने प्रयास गरिएको हो। ‘प्रतिवेदन लुकाएर पीडित परिवारप्रति अन्याय गरिएको छ, त्यसैले छिटो सार्वजनिक गर्न दबाब दिन यस्तो सांकेतिक प्रदर्शन गरेका हौं,’ उनले बताए।
जाँचबुझ आयोगले सरकारलाई प्रतिवेदन बुझाइसकेको भए पनि सार्वजनिक नभएकाले पछिल्ला दिनहरूमा विभिन्न युवा समूहले निरन्तर रूपमा प्रदर्शन गर्दै आएका छन्।
