बुटवल — नेकपा एमालेका नेता सुरेन्द्र पाण्डेले पार्टीले आफ्ना कमजोरी सुधार नगरे अर्को निर्वाचनमा सिट संख्या ‘स्कुटरमा अट्ने’ अवस्थामा पुग्ने चेतावनी दिएका छन्।
चिन्तन अभियान नेपालले बुटवलमा आयोजना गरेको कार्यक्रममा बोल्दै उनले पछिल्ला तीन निर्वाचनको परिणामले एमाले मात्र नभई पुराना दलहरूको अवस्था कमजोर बन्दै गएको बताए।
उनले २०७४ मा १७४ सिट जितेको एमाले अहिले क्रमशः खुम्चिँदै गएको उल्लेख गर्दै “पहिला बस, त्यसपछि माइक्रो बस र अब स्कुटर” जस्तो अवस्थातर्फ जाँदै गरेको टिप्पणी गरे।
पाण्डेले नेतृत्वले कमजोरी स्वीकार नगरे र सुधारको प्रयास नगरे आगामी निर्वाचनमा उम्मेदवार नै नपाउने अवस्था आउन सक्ने चेतावनी दिए।
उनका अनुसार विगतका गलत नीतिका कारण पार्टी अहिलेको अवस्थामा पुगेको भन्दै अब त्यसलाई सच्याएर सही दिशामा लैजानुपर्ने आवश्यकता औंल्याए। साथै संविधानमै नेतृत्वको कार्यकाल सीमित गर्ने व्यवस्था गर्न नसक्नु पनि ठूलो कमजोरी भएको उनको भनाइ छ।
